შობის მოახლოებასთან ერთად, პოლონურ ტრადიციაში განსაკუთრებულ ადგილს იკავებს საშობაო საგალობლები, რომლებიც საუკუნეების მანძილზე თაობიდან თაობას გადაეცემა. თუმცა, ცოტამ თუ იცის, როდის და სად დაიბადა პირველი პოლონური საგალობელი, რომელმაც საფუძველი ჩაუყარა ამ მდიდარ მემკვიდრეობას.
ისტორიკოსებისა და მუსიკათმცოდნეების კვლევებით, პირველ ცნობილ პოლონურ საშობაო საგალობლად მიჩნეულია ნაწარმოები სახელწოდებით „Zdrów bądź, Krolu Anjelski“ (მოგესალმებით, ანგელოზთა მეფე). ეს უნიკალური ტექსტი 1424 წლით თარიღდება და მისი ავტორი უცნობია.
საგალობელი აღმოჩენილ იქნა კრაკოვში, ზვიერჟინეცის ნორბერტინელი დების მონასტრის იან შჩეკნას ქადაგებების კრებულში. „Zdrów bądź, Krolu Anjelski“ წარმოადგენს ქებას იესოს, მარიამისა და იოსების მიმართ, სადაც აღწერილია ქრისტეს შობა. მისი ტექსტი ღრმა რელიგიური შინაარსითა და პოეტური სილამაზით გამოირჩევა, რაც მას შუა საუკუნეების პოლონური რელიგიური პოეზიის გამორჩეულ ნიმუშად აქცევს.
თავდაპირველად, საშობაო საგალობლები ძირითადად ლათინურ ენაზე სრულდებოდა. პოლონურ ენაზე შექმნილი საგალობლები მოგვიანებით გაჩნდა, რამაც ხელი შეუწყო საშობაო ტრადიციების გამყარებასა და მათ უფრო ფართო მასებისთვის ხელმისაწვდომობას. „Zdrów bądź, Krolu Anjelski“ არა მხოლოდ უძველესი, არამედ კულტურულად მნიშვნელოვანი ძეგლია, რომელიც პოლონური საშობაო მუსიკისა და ლიტერატურის განვითარების საწყისებს ასახავს.
მოამზადა ნათია ქიმაძემ